Titser sa Taloot mi-deny nga gipasunog ang projects

CEBU, Philippines - Kusganong gihimakak sa magtutudlong si Angelina Langi ang Grade III teacher sa Taloot Central Elementary School nga gireklamo sa usa ka ginikanan tungod sa giingong pagsunog niini sa mga notebooks ug projects sa iyang tinun-an.

Ang Banat News nga giimbitar sa gipahigayong meeting tali sa ginikanan sa bata ug sa mga magtutudlo kabahin sa maong isyu gibasol pa hinuon sa maong magtutudlo nga premature nga mipagawas sa maong estorya. Migawas nga aksidente ang pagkasunog sa maong mga notebook.

Apan ang inahan sa usa sa mga bata sa sayo pa mireklamo sa Banat News base sa gisumbong sa mga anak nga gisunog ang ilang mga notebook ug project gumikan kay nasuko ang ilang maestra nga hugaw ang iyang lawak.

Wala hinganli sa Banat News ang maong magtutudlo aron maprotihian ang iyang pagkatawo ug hangtud nga dili makuhaan sa iyang habig kabahin sa hitabo.

Ang Banat News niadtong tungura nahapunan og tawag sa telepono sa maong tunghaan apan walay mitubag niini, nasayran gikan sa prinsipal nga si Lilliosa Paller nga busy sila kaayo sa trabaho maong walay nakatubag.

Matud pa ni Langi nga wala gyud siya magmandong ipasunog ang mga notebook ug projects, ang iyang kamandoan sa mga tinun-an nga palimpyohan ang iyang classroom tungod kay nagkatag ang mga papel ug mga notebooks nga wala na panggamita.

Dugang pa ni Langi nga wala gyud siya kalibutan nga adunay mga projects ug mga notebooks sa iyang mga tinun-an nga naapil og sunog ug wala tuyoang naapil kini.

Aminado si Langi nga napakyas siya sa pagpahimangno sa mga tinun-an nga nanglimpyo nga susihon og maayo ang ilang sunogong basura nga di maapil ang mga projects ug notebooks.

Samtang ang prinsipal sa maong tunghaan nga si Liliosa Paller mibutyag usab nga nagpaabot nalang sila kun unsa ang buhaton karun sa ilang labaw ug kun unsa ang resulta niini ila usab kini nga dawaton. – BANAT NEWS