5 patay paghagsa sa firewall

CEBU, Philippines - Lima ka construction worker ang patay samtang unom ang naangol dihang nahunlak ang firewall sa gihimong mall sa dalan F. Llamas sa barangay Tisa pasado ala-una sa kaadlawon kagahapon sa kaadlawon.

Ang namatay nailhan nga sila Doenny Nirza Delan, 30 ang manghod nga Christian, 27, Teodulfo Detumal, Lyndon Melendrez,18 ug Argie Ceniza, 27 pulos molupyo sa lungsod sa Carmen.

Samtang ang naangol mao sila Jerome Siose,19, Ricardo Rixon Villegas, 27, Joy Manseras, 36, Arnel Pacible,23, Roel Pasaje, 26, ug Noel Lucero, 23. Ang mga nangamatay nagtrabaho isip mason ug panday sa maong construction.

Sa pakighinabi sa Banat News ni Arnel Pacible usa sa mga survivor nga nag-overtime sila sa ilang gi-finishing nga bungbong sa rooftop sa maong building.

Matud pa nila nga ilahang nabantayan samtang ilaha kining gitrabaho nga nagpunay og katagak ang semento gikan sa ibabaw nga ilaha untang i-finishing.

Apan wala lang nila kini panumbalinga sa pagtuong posibleng mga tinagak ra kini nga nasangit, diha nalang siya nakugang dihang kalit nga nahugmak ang bungbong sa maong building ug mihagsa kanila.

Tungod sa maong panghitabo nag-iyahay nalang sila og salbaray sa ilang mga kaugalingon palayo sa nahunlak nga bungbong samtang si Pacible naniguro sa pagkupot sa usa ka poste sa kuryente hangtod nga maoy nakasalimbong kaniya.

Samtang ang igsuon sa duha nga nangamatay nga si Dave Delan masulob-on usab nga mibutyag sa Banat News nga kung wala mahagbong ang iyang paleta maapil siya og kadat-ugan sa dakong haligi, sumala pa niya mikanaog siya aron kini puniton.

Samtang sa pakighinabi sa Banat News ni Edel Luana, representante sa CYC Construction nga maoy nitrabaho sa maong building nagkanayon nga ang contractor nilang si Charles Yu Chui maoy mo-abaga sa tanang gastohanan sa pagpa-ospital sa mga biktima ug sa mga namatay.

Si Engr. Josefa Ylanan, officer-in charge sa Office of the Building Official nagkanayon nga mihimo na sila og imbestigasyon sa insidente ug nadiskubrehan sa ilang mga imbestigador nga ang curing period sa sementong gidapatan sa finishing wala pa hingpit nga matapos.

Kini maoy hinungdan nga nahugno ang kural nga gitaptan sa damba nga gitungtungan sa mga biktima, si Ylanan midugang nga base sa pagsusi husto ang gidak-on sa kabilyang gigamit, apan ilaha gihapong tan-awon ang ubang kalapasan sa kontraktor.

Samtang nagpadayon ang imbestigasyon, gisuspenso sa OBO ang tanang trabaho sa maong building, kagahapon gihatud na ang notice of suspension kabahin niini.

Ang chairman sa Cebu City Disaster Coordinating Council nga si Konsehal Gerardo Carillo mipatawag kagahapon og emergency meeting kabahin sa maong insidente, gipatawag og apil ang mga representante sa Gaisano Capital ug CYC Construction.

Naapil og kaigo ang duha ka balay,usa ka sakyanan ug duha ka traysikol. Matud pang barangay Kapitan Eduardo Cabulao sa report sa DyLA nga napawong ang kuryente sa napulo ka sitio sa ilang barangay ingon man lima ka subdivision.

Si Department of Labor and Employment kon DOLE director Elias Cayanong mibutyag nga ilang susihon kon eksakto ang suhulan ug benepisyo sa mga trabahante sa CYC construction.

Nasayran nga usa sa mga naluwas sa maong trahedya nga mao si Dave Delan miasoy sa mga sakop sa media nga 17 pesos lamang ang suhulan matag oras samtang ang mga nangamatay gisweldohan lamang og 23.75 pesos matag oras isip mga mason.  - Uban sa report nila ni Chester Abadilla, Darrel Carumba ug Fred Languido sa The Freeman (BANAT NEWS)