CEBU, Philippines - Naputos sa samad pinusilan ang tulo ka menor de edad nga giingong mga sakop sa gang diha sa dalan F. Pacaña Tres de Abril sa barangay Punta Princesa dakbayan sa Sugbo niadtong milabay’ng gabii.
Ang mga biktima nagpangidaron og 1, 15 ug 17 anyos nga mga pulos tinun-an sa Tisa National High School ug mga residente sa maong barangay samtang ang mga gikatahapan nagsakay og kolor pula nga motorsiklo. Sa pasiunang imbestigasyon sa kapolisan sa Punta Prinsesa Police Station pinanguluhan ni PO3 Fortuna Maracas, ang tulo gikan pa miduaw sa haya sa ilang kaubang gang member nga gipusil- patay niadtong Marso sa pareho gihapong kaso.
Sa dihang naglakaw padulong pauli ang tulo ka biktima kauban ang lain pang mga gang members kalit nga mibutho ang usa ka motorsiklo ug ang sakay niini mipaulan kanila og bala.
Nakaangkon og samad ang 16-anyos sa iyang likod, samtang parehong naigo sa tuong tiil ug tuhod ang 15 ug 17 anyos ug gidala ngadto sa Cebu City Medical Center. - BANAT NEWS