CEBU, Philippines - Ang buhatan sa Commission on Elections mipahibalong nagsugod na sila og plano sa pagpadayon sa plebisito nga magbuwag sa sitio Banawa-Englis gikan sa barangay Guadalupe.
Si Provincial Election Supervisor Atty. Lionel Marco Castillano nagkanayon nga ang plebisito mapahigayon humanna sa presidential election karong Mayo 10 tuig 2010 tungod kay wala na silay igong panahon.
Matud pa ni Castillano nga nagpaabot pa sila og pagtugot sa Comelec Manila kabahin niini.
Si Castillano miingon ang ilang buhatan nakatutok karon tanang mga preparasyon alang sa labing unangpoll automated presidential elections.
Si Regional Trial Court kon RTC-7 Branch 58 Judge Gabriel Ingles mibasura na niadtong miaging bulan sa petition for issuance of Writ of Preliminary Injunction nga giduso sa korte ni Labangon barangay councilor Victor Miñoza Buendia kinsa mikwestiyon kun ang Rosalina Village sakop sa barangay Labangon o sa barangay Guadalupe.
Migawas nga sakop gyud sa Guadaluupe ang maong village base sa mga ordinansa sa nanglabay'ng katuigan maong walay hurisdiksyon si Buendia aron kwestyunon kini.
Ang petisyon ni Buendia maoy nakaingon nga wala mahinayon ang plebisito ug naputol ang pagpangandam niini. - BANAT NEWS