'Black propaganda' gireklamo sa oposisyon

CEBU, Philippines - Mitiyabaw ang kampo sa oposisyon sa dakbayan sa Mandaue ug mipasangil sa administrasyon nga migamit og ‘black propaganda’ sa matag pulong-pulong sa kabarangayan pinaagi sa pagpamasangil nga ilang gibabagan diha sa konseho ang pagpagawas sa hinabang pinansyal sa mga senior citizens sa dakbayan karung tuiga.

Gibutyag ni Bise Mayor Carlo Fortuna sa interbyu sa DyDD nga dili tinuod ang gipakatap sa kampo ni Mayor Jonas Cortes nga ilang gibabagan angresolusyon ni Konsehal Vic Biaño nga ma-release og sayo karung tuiga ang P1,000 alang sa mga senior citizens.

Gipasabot ni Fortuna nga ang tinuod dihang gipahigayun ang sesyon sa milabay'ng buwan hapit na mahuman ang sesyon dihang miabot si Biaño nga maoy nangamahan sa resolusyon.

Giklaro usab ni Fortuna nga gawas niini dili usab makasapaw ang resolusyon sa ordinansa nga na-aprubahan nga iyang gipangamahanan nga nagpataas sa tag P500 nga assistance sa senior citizens matag tuig ug gihimo niya kining P2,000.

Gipasabot ni Fortuna nga subay sa ordinansa ka duha ka higayun matag tuig ihatag ang maong hinabang sa syudad matag buwan sa Hunyo ug buwan sa Disyembre.

Dugang pa ni Fortuna nga kun seryoso ug gusto gyud nga mahatag og sayo ang financial assistance sa mga senior citizens kinahanglang amendahon ang napasar nga ordinansa.

Gisuwayan unta pagtawag ang buhatan ni Cortes sa City Hall kagahapon sa udto aron pagkuha sa iyang habig apan wala kini sa iyang opisina.  - BANAT NEWS