3 bata gi-hostage

CEBU, Philippines - Tulo ka managsuong bata ang gi-hostage sulod sa usa ka oras kapin sa kaipon sa ilahang inahan diha sa sitio Kalipayan barangay Punta Engaño dakbayan sa Lapulapu kagahapon sa hapon.

Matud pa ni Lapulapu City Police Office Director Sr. Supt. Mariano Natuel Jr. nga utang ang hinungdan sa pagpang-hostage ni Dionisio Salvador, 40, lumad gikan sa Mindanao ug kasamtangang nagpuyo sa maong dapit.

Ang gi-hostage ni Salvador ang tulo ka mga batang nagpangidaron og 10-anyos nga lalaki, singko ug tres anyos nga babayeng mga anak ni Meimei Arcawayan, 30, minyo apan nakig-ipon sa suspek.

Ang mga polis mipadala og Special Weapons and Tactics ug negosyador nga si Insp. Christian Torres apan kadugayan si Natuel na maoy nakig-estorya sa suspek.

Matud pang Natuel, ang mga bata gipanggapos og pisi sa suspek ug gibutang sa gawas sa balay ug nabuwad sa init samtang gipangtiunan og sundang.

Ang suspek midemanda sa inahan sa mga bata nga bayran ang P115 mil nga bayad sa utang ug interest ngadto sa igsuon sa suspek.

Sumala pa ni Natuel ang maong utang niadto pa kining Nobiyembre sa milabay’ng tuig apan tungod kay wala makabayad midako ang interes niini ug miabot na hinuon sa P115 mil. Gikatahong si Salvador ang mi-guarantor niini maong nasuko ang suspek nga hangtud karon wala pa mabayri ang utang hinungdan nga iyahang gi-pressure ang inahan sa mga bata pinaagi sa pag-hostage sa mga bata.

Ang mga residente pagkakita sa gibuhat niini sa mga bata daling misumbong sa Station 2 sa barangay Mactan. Ang unang mirespondeng mga polis misuway og luwas sa mga bata apan gihunatan og tigbas sa suspek ang mga bata hinungdan nga misibog nalang sila ug nagpaabot og laing negosyador.

Sa kadugayan, ang suspek mitug-an sa mga polis kabahin sa iyang problema ug miangkong nahadlok siyang pasakitan sa mga tawo tungod sa iyang gibuhat ingon man pagpasaka og kaso tungod niini.

Si Natuel gumikan sa nakitang tsansa nga maluwas ang mga bata mipasalig sa suspek nga di kini pasipad-an ug pasakaan og kaso sa mga polis hinungdan nga boluntaryong mitahan ang suspek.

Si Natuel nagkanayon nga ang mga polis dili mopasaka og kaso sa kabalakang kun makapiyansa ang suspek panimaslan niini ang mga biktima apan dili siya makapugong sa inahan sa mga bata, ang Department of Social Welfare and Development ug mga silingan nga mangunay og kiha batok ni Salvador. - Uban sa report ni Brenda Batuto (BANAT NEWS)