Hubog giluba'g buak nga botelya

CEBU, Philippines - Nabulit sa mga samad ang lawas sa usa ka hubog human kini dunggaba og botelyang buak sa iyang silingan didto sa barangay Ibo, dakbayan sa Lapulapu sa miaging kaadlawon.

Ang biktima mao si Mauro Ybanez Paller, 33 , ulitawo nga taga Gate 4 sa maong barangay, samtang ang suspetsado mao si Eduardo Patac Paller, (paryente nga dili suod) hingkod ang panuigon ug silingan sa biktima.

Si imbestigasyon nga gihimo nila ni SPO3 Rex Ybanez sa homicide section sa kapolisan sa maong dakbayan   nasayran nga puwerting lasbaga sa biktima dihang gidunggab kini

Sumala sa kapolisan nga gikainom sa biktima ang pareha niya og apilyido ug dihang nahubog na, giingong nanghasi na kini (biktima) ug gipamunal sa yuta ang mga basiyo sa mga botelya nga ilang gilala.

Giingong gibadlong kini sa suspetsado apan misamot na hinuon ang pag-wild .

Dihang naupsan na sa pailob ang suspetsado, gipunit niini ang usa ka buak nga basiyo sa bino, ug gihansak ngadto sa lawas sa biktima.

Gumikan sa kahait ug katalinis sa buak nga bildo, natagbaw sa mga samad sa iyang lawas ang biktima.

Gumikan sa maong mga samad nahuwasan sa kahubog ang biktima ug nanaad nga dili na mousab sa paghuboghubog.

Gihatod dayon siya ngadto sa   Mactan Doctors Hospital samtang ang suspetsado mitahan usab sa iyang kaugalingon ngadto sa kapolisan sa maong dakbayan. - Romeo T. Limpangog