Graduation nagubot

CEBU, Philippines – Nagubot ang graduation rites kagahapon diha sa Punta Engaño Elementary School sa dakbayan sa Lapulapu human mobutho ang usa ka kandidato sa pagkamayor nga si Efren Pelaez Jr. apan gidid-ang makasaka sa entablado aron pagtunol sa scholarship program niini ngadto sa mga valedictorian ug salutatorian.

Sa report sa TV Patrol Central Visayas gikatahong gidid-an si Pelaez sa mga opisyales sa tunghaan nga makasaka ug makatunol sa iyang scholarship grants sa mga tinun-ang migradwar.

Si Pelaez sa iyang bahin nagkanayon nga igo ra siyang motunol niini ug walay labot pamolitika sanglit 16 na ka tuig niyang gihimo kini alang sa mga tinun-ang naa sa top honors. Sagad usab siyang maoy imbitahon isip guest speaker sa mga nangaging graduation ceremonies.

Si Mary Ann Ogdoc, prinsipal sa maong tunghaan nagkanayon nga dili niya buot masagulan og pamolitika ang maong seremonyas. Gikatahong buot lamang sa school officials nga ini’g katapos nalang sa eleksyon niya mahimong itunol ang scholarship.

Ang DepEd mipagawas og direktiba sa mga tunghaan pagdili nga masagulan og politika ang mga seremonyas sa graduations.

Apan ang mga tinun-an ug ginikanan nga mao untay makadawat sa maong scholarships wala malipay niini ug mipakita sa ilang pagsupak diha sa maong tunghaan.

Nisamot ang tensyon dihang ang police escort ni Pelaez misitar sa usa sa mga barangay tanod nga may nagbagal sa hawak ug nagtuong armas kini apan kusganong mihimakak niini ang maong tanod ug mibahad nga mosumbong dili lang ngadto sa ilang barangay kapitan kundili lakip na kang Mayor Arturo Radaza. (BANAT NEWS)