Polis gidakop kay nangulata'g tawo

CEBU, Philippines – Nagtingkagol sa karsel sa Fuente Osmeña police station ang usa ka polis nga sakop sa Cebu City Mobile Group human pasanginling nangulata og usa ka lalaki diha sa Open Plaza Mango Square pasado alas singko sa kaadlawon sa miaging buntag.

Si PO3 Arturo Lawas, sa CCMG ang gisikop sa iyang gikulatang si William Go, 36, molupyo sa Jagobiao siyudad sa Mandaue nga mireklamong iyang gipatid-patiran ug gitionan og armas sa walay igong hinungdan.

Wala pa maklaro kun unsay hinungdan sa pagpanagmal sa maong polis apan gituuhang nakainom kini.

Matud pa ni Chief Insp. Arnel Banzon ang hepe sa Fuente Police Station sa pakighinabi sa mga tigbalita kagahapon nga kun ugaling ang biktima dili na mobalik sa ilang buhatan mapugos usab sila sa pagpagawas sa suspetsado.

Samtang si Cebu City Police director Patrocinio Comendador sa iyang bahin mibutyag ila na karun nga gipaubos sa imbestigasyon ang suspetsado.

Matud pa ni Comendador nga posibling pasakaan og kasong paglapas sa Comelec Gun Ban ang maong polis human kini nagbitbit og armas nga wala magsul-ob sa required uniform sa Commission on Elections.

Ang mga polis ug militar mahimo lamang makadala og mga armas kun magsuot sila og kumpletong uniporme aron mailhan silang mga sakop sa awtoridad.

Dugang pa ni Comendador nga ilaha usab sugdan ang paghimo og imbestigasyon alang sa pagpasaka og kasong administratiba batok sa maong polis. Gikatahong kaniadto gireklamo na usab si Lawas ug napasakaan og kaso human pasanginling nanagpa og 6-anyos nga bata apan nahibalik sa serbisyo human siya mo-appeal sa korte ug na-acquitted sa maong kaso. (BANAT NEWS)