CEBU, Philippines – Naputos og samad pinusilan ang usa ka lalaki human kini gipaulanan og bala sa wala mailhing mamumuno pasado alas-9 sa miaging gabii diha duol sa Museum Sugbo, barangay Tejero.
Si Judito Pinote, molupyo sa maong lugar naputos sa samad pinusilan human kini gipusil sa wala mailhing tawo gamit ang kalibre .45 base sa mga nakuhang basiyo sa mga bala diha sa crime scene.
Base sa imbestigasyon sa kapolisan nasayran nga ang biktima nagkaon sa iyang panihapon sulod sa ilang panimalay dihang dunay nanuktok sa ilang pultahan.
Pagsusi sa biktima kalit siyang gisugat og mga bala sa mamumuno ug naigo sa nagkadaiyang parte sa iyang lawas ilabi na sa dughan. Ang mamumuno daling miikyas palayo sa dapit.
Sa pakighinabi sa Banat News kang PO3 Edario Manatad sa homicide section mibutyag kini nga posibling dakong kasuko maoy nagtukmod sa mamumuno sa pagpatay sa biktima.
Gitan-aw karun sa kapolisan ang posibilidad nga may kalambigitan sa ilegal nga drugas ang krimen sanglit giingong drug prone area ang maong lugar. - Lesley Caminade (BANAT NEWS)