Chief Justice Davide nangampanya na

CEBU, Philippines – Gihulagway ni kanhi Supreme Court Justice Hilario Davide Jr. nga daw sangka ni David ug Goliath ang panag-atbang sa iyang anak nga si Hilario ‘Jun” Davide III batok kang Gob. Gwendolyn Garcia karong umaabot nga May elections.

Si Davide kanhi Ambassador to the United Nations mi-resign sa iyang posisyon aron tabangan ang kandidatura sa iyang anak ug ang kapares niining si Bise Gob. Gregorio Sanchez Jr, sa pagpangampanya sa lalawigan sa Sugbu.

Matud pa niini nga dili pa uwahi ang tanan aron makatabang siya sa pangampanya sa iyang anak kinsa gituuhan niyang maoy maghatag og dakong kausaban sa panglantaw sa mga Sugbuanon kung unsay tinuuray nga serbisyo publiko.

Gitataw niini nga ang iyang pagtabang sa kandidatura sa iyang anak wala magpasabot nga huyang ang kandidatura sa anak kun dili iya lamang nakita ang dakong panginahanglan nga makabaton ang mga Sugbuanon og matinud-anong lider.

Si Davide Jr. karon pang Hunyo 30 pa unta motapos sa iyang termino sa UN tungod kay co-terminos kini sa presidente sa nasud apan mi-resign siya niadtong Abril 1, siya nakaserbisyo og tulo ka tuig ug 35 ka adlaw isip ambassador.

Matud pa niini nga sa dihang midagan ang iyang anak sa pagka-konsehal sa dakbayan sa Sugbu niadtong 2004 ug nahimong number one councilor wala gyud siya makatabang niini sa pangampanya.

Tungod sa eksperiyensya sa iyang anak pagka-konsehal sulod sa duha ka termino dako siya’g pagtuo kun modaog iyang anak ug si Sanchez, ang katawhan sa probinsya dili magmahay tungod kay duna ang duha og integridad, matinud-anon.

Sumala pa niya nga ang anak susama ra kang David nga makigsangka kang Garcia nga sama kang Goliath. Si Garcia nakaplastar na sa lalawigan isip gobernador samtang ang iyang anak nagtangas pa lamang.

Isipon sa kanhi Chief Justice nga usa ka dakong milagro kun makadaug man gani ang iyang anak pagkagobernador sa lalawigan.

Gawas sa iyang anak, ang kanhi Chief Justice mukampanya usab sa ubang mga kandidato sa Liberal Party ilabina sa kandidato sa pagkapresidente nga si Senador Noynoy Aquino.

Sa habig usab sa kampo ni Garcia, si Capitol Consultant on Information Atty. Rory Jon Sepulveda nagkanayon nga wala sila mahadlok sa pagsugod na sa pagpangampanya sa kanhi Chief Justice ngadto sa ilang kaatbang nga kandidato.

Matud pa niini nga ila nang gipangandaman ang pagsuporta sa amahan ni Davide   pinaagi sa paghingusog pa sa ilang kampanya. - Rey Pasaporte ug Chester Abadilla (BANAT NEWS)