Tomas maayo lang sa 1st term-Georgia

CEBU, Philippines - Bisan paman sa kadaghan sa mga nahimo ni Mayor Tomas Osmeña sa dakbayan sa Sugbu, ang igsuon niining si Georgia Osmeña nagkanayon nga daghan pa ang kakulangon ang dakbayan nga naa sa ubang mga siyudad sa nasud.

Kini maong mga kakulangon maoy buot nga buhaton o ihatag ni Georgia sa higayon nga siya modaog karong piniliay sumala pa niini dihang giimbitar sa roundtable discussion sa The Freeman niadtong milabay'ng semana.

Matud pang Georgia kinsa mitukod og kaugalingong partidong Go Cebu, usa sa nakita niyang kakulangon mao ang amusement parks, children’s playground ug city day tours alang sa mga turista.

Gihimong sanglitanan ni Georgia ang ubang mga siyudad nga dili susama ka adunahan sa Sugbu apan nakahimo pagbutang og susamang mga pasilidad ug programa.

Matud pang Georgia wala gani programa ang dakbayan alang sa mga lokal ug langyaw’ng turista sama sa day tours tungod kay matud pa niini kulang gyud kaayo ang mga tourist spots sa dakbayan.

Ang Sugbu adunay dakong panid sa kasaysayan sa Pilipinas tungod kay dinhi unang midagsa ang mga Espanyol nga nagdala sa Kristiyanismo.

Buot ni Georgia nga palambuon pa ang tourist spots ug moagni og mga kompanya pagtukod og theme park susama sa makita karon sa kaulohan ug sa Estados Unidos ug Hongkong nga Disneyland, apan kinahanglang bisan kabus makasulod niini ug dili lang kinahanglang adunahan ray maka-afford.

Samtang gihulagway niyang dili maayong talan-awon ang Inayawan landfill alang sa mga investors maong buot niyang ibalhin kini ug dumalaon sa mga environmentalists samtang ang mga basurerong mawad-an og panginabuhian kuhaong garbage consultants nga maoy manudlo sa mga tawo sa pag-recycle ug segregate sa mga basura.

Si Georgia nga naa sa real state business una nang mipadayag nga supak siya sa Light Rail Transit, ibalhin ug mas paborableng lugar ang Carbon Market nga layo sa City Hall ug sa Malacañang sa Sugbu.

Gusto usab ni Georgia nga mahatagan ang mga kabus nga walay panimalay pinaagi sa pagpatukod og high-rise buildings nga susama sa mga condominiums aron ilang kapuy-an.

Gisaway ni Georgia ang mga pinuy-anang gipahulog-hulogan sa siyudad og P10 matag adlaw sa mga molupyo sa barangay Mambaling nga matud pa niya wala gani mga kasilyas ug maayong drainage system.

Nagkanayon si Georgia nga ang labing maayong nahimo sa maguwang nahitabo sa unang termino palang niini apan ang nagsunod nga mga termino nausab ang pokus niini ug napasagdan ang ubang importanteng serbisyo alang sa publiko. – BANAT NEWS