Trak natagak sa minahan, 1 patay

CEBU, Philippines - Duha ang patay sa managlahing dapit, usa niini drayber sa Carmen Copper Corporation human aksidenteng natagak ang iyang gimanehong dump truck sa bung-aw diha sa sulod sa minahan sa Lutopan syudad sa Toledo.

Alas-9 sa miaging gabii gikatahong nagmaneho sa iyang trak si Joseph Daculan, 45, molupyo sa Silangan barangay Cantabaco sulod sa minahan sa nahisgutang kumpanya dihang nahitabo ang aksidente.

Base sa pasiunang imbestigasyon sa kapolisan gikan sa ibabaw ang maong trak padulong unta sa pit kun bangag sa minahan apan kalit nawad-an og kontrol sa manobela si Daculan ug nadiretso ang trak sa bung-aw.

Sumala pa sa report sa kapolisan sa Toledo diha sa Cebu Provincial Police Office, dangog niadtong tungura ang agianan sa mga trak ug wala na makapaak og maayo ang spike sa mga ligid hinungdan nga natagak ngadto sa bung-aw ang trak.

Nagtuo ang hepe sa Toledo nga si Insp. George Macapobre dihang gikahinabi sa Banat News nga gitinguha sa biktima nga maka-ikyas pinaagi sa paglayat apan namatay gihapon kini tungod sa gilawmon sa iyang gitugpahan.

Samtang ang trak niini adto mitugpa sa mas lawom nga bahin sa minahan nga gibana-banang 33 ka metros ug naghayang na.

Sa laing bahin, pasado alas-8 sa miaging gabii patay si Raffy Navarro, 24, taga sitio Carreta sa barangay Valladolid human makabangga sa iyang motorsiklo ang usa ka cab diha sa sitio Tangasan sa samang barangay sa lungsod sa Carcar.

Naangol usab ang mga angkas niining sila si Joey Quijano ug ang drayber sa gikabanggang cab nga si Elizar Bentola ug ang managsuong pasahero niining   sila si Cleofe ug Yedda Cañete.

Base sa imbestigasyon sa kapolisan sa Carcar nagkatagbo ang duha diha sa maong dapit ug pulos dunay gisundang sakyanan ug sa kalit lang ang duha parehong mi-overtake sa mga nag-una kanilang sakyanan hinungdan sa ilang panagsungagay.

Ang mga biktima daling gitabang ug gidala sa Carcar City District Hospital apan dead on arrival si Navarro samtang padayon pang giatiman ang tulo.  – BANAT NEWS