PUJ driver nga gustong magmayor sa Sugbo adunay mga programa

CEBU, Philippines - Bisan paman sa mga pagtamay ug pagbugal-bugal kaniya, ang jeepney driver nga midagan pagkamayor sa dakbayan sa Sugbu nagtuong aduna siya’y mahimo aron matabangan ang kahimtang sa siyudad.

Ang 61-anyos nga si Rudy Laconza, midagan ug naparot kang Mayor Tomas Osmeña niadtong nakalabay'ng eleksyon 2007 nagkanayon wala siya dakong partido susama sa ka popular sa mga mikandidato karon.

Apan siya mipasalig nga kun palaron, unahon niya ang kahimtang karon sa health services sa siyudad nga sumala pa niya napasagdan ni Osmeña tungod sa kahimtang karon sa Cebu City Medical Center nga kanunay'ng mahutdan og tambal ug kakulang sa serbisyo.

Si Laconza kinsa giimbitar sa roundtable discussion sa The Freeman isip usa sa mga kandidato sa siyudad nagkanayon nga imbes ibaligya ang CCMC kun siya’y palaron iyaha pa hinuon kining pun-an sa south ug north districts.

Matud pa niya nga makapangayo siya og suporta sa mga kongresista ug senador aron maoy gamiton alang sa maong katuyoan.

Samtang kun ang ubang mga drayber nagpunay og reklamo ug miakusar sa pagkurakot sa mga traffic enforcers sa siyudad, si Laconza nagkanayon nga ang maayo solusyon niini mao ang pagpataas sa suhulan sa mga enforcers.

Kadtong masakpang mangilkil walay dapig-dapig nga taktakon dayon sa serbisyo aron dili sundon sa uban. Hinuon duna usab siya’y ikasaway sa mga traffic laws nga gipatuman dinhi sa siyudad isip usa usab ka drayber.

Matud pa niya nga napuno nalang og “no stopping” signs ang kadalanan ug misugyot sa City Traffic Office Management nga magbutang gyud og specific nga dapit nga himuong jeepney stop.

Iyaha usab gisugyot nga usa sa maayong solusyon pagpaluag sa dagan sa trapiko sa dakbayan mao ang pagpatuman og color coding scheme ug odd-even scheme sa mga plate numbers sa mga sakyanan nga tugutang makadagan nianang partikular nga adlaw ug dunay mga dalan nga di pasudlan niining mga sakyanan panahon sa tingsakay.

Samtang kabahin sa Bus Rapid Transport (BRT) nga giplanuhang ipatuman dinhi sa siyudad, si Laconza nagkanayon nga kinahanglang adunay konsultasyong himuon kabahin niini.

Si Laconza nakaabot og 3rd Year sa kursong Bachelor of Science on Elementary Education (BSEED) ug kasamtangang namasahero og jeepney nga may rotang Lahug-Carbon. (BANATNEWS)