2 gipamusil patay

CEBU, Philippines - Duha ka manag-uyoang namahad og silingan niadtong milabay'ng Biyernes Santos gipamatay kagahapon sa kaadlawon diha sa ilang gikatulgan gawas sa ilang balay sa sitio Sangi sa barangay Hagnaya sa lungsod sa San Remegio.

Ang mga nakalas giilang sila si Danilo Pitogo Villar, minyo ug trabahante sa Philippine Amusement and Gaming Corporation nga residente sa lungsod sa Consolacion, iyang uyoan nga si Jimmy Olivar, 53, residente sa nahitaboan.

Samtang nadakpan nila ni Sr. Insp. Rolly Lauron, hepe sa San Remegio Police Station uban nila ni PO3 Joe Johnsky Ynot, PO3 Wendell Pestaño ug PO2 Randy Sibay ang suspek nga si Adonis Yurag Dignos,39, usa ka military asset.

Si Lauron dihang gikahinabi sa Banat News nagkanayon nga panagbingkil sa balay gipuy-an sa suspek ang gituuhan nilang motibo sa pagpatay, ang balay giingong gipanag-iya sa igsuon ni Danilo nga si Carmelita apan gipaabangan kini sa kanhi bana sa naulahi ngadto sa biktima sulod sa lima ka tuig.

Matud pang Lauron wala ikahimuot sa mga kabanay ni Carmelita ang pagpaabang sa gibuwagang bana niini nga nailhan lang sa pangalang Titing ngadto sa suspek.

Ang maong balay orihinal nga gipanag-iya sa mga ginikanan nila ni Carmelita ug sa biktimang si Danilo nga napalit sa managtiayong Carmelita ug Titing, ug si Titing ra maoy gikasabot sa suspek kabahin sa pag-abang niini.

Sumala pa sa mga nakuhang impormasyon nila ni Lauron, ang suspek gikatahong magpunay pud og panghari-hari sa maong dapit maong wala sila makauyon niini.

Niadtong Biyernes Santos sa hapon, gikatahong hubog ang mga biktima ug gisulong ang balay sa suspek ug gibaharang sunogon ang balay ug kini patyon.

Apan kagahapon sa kaadlawon, ang mga biktima uban sa kinamanghurang igsuon ni Danilo ug uyoan nangatulog gawas sa ilang balay ibabaw sa katre dihang kalit nga gipamusil sa suspek.

Matud pang Lauron nakakita ang kinamanghuran nila ni Danilo sa suspek paghimo niini apan wala siya apila sa pagpusil sanglit wala man kini moapil pagsulong sa balay sa suspek niadtong Biyernes.

Human sa hitabo daling gidala ang duha sa Don Severo Verallo District Hospital apan pulos gideklarar nga dead on arrival, si Danilo dunay samad pinusilan sa ulo samtang sa walang abaga nga milapos sa tuong kilid usab ang nahiaguman sa uyoan niini nga si Jimmy.

Sila si Lauron nakadawat og impormasyong diha magtago sa balay sa higala duol sa San Remegio Central Elementary School sa barangay Poblacion ang suspek hinungdan nga ilaha kining giadto ug gidakop.

Sumala pang Lauron hugtanong mihimakak ang suspek sa mga pasangil kalabot sa krimen. Kagahapon sa hapon gipailawom sa paraffin test sa PNP Crime Laboratory ang suspek samtang giandam na ang kasong double murder batok kaniya nga ipasaka ugmang adlawa.   (BANATNEWS)