Radaza gipasakaan og kiha

CEBU, Philippines - Pormal nang mipasaka og “Motion for Declaratory Relief” si NPC Lapulapu City Mayoralty candidate Junard “Ahong” Chan ngadto sa Comelec en banc batok sa kampo sa mga Radaza gumikan sa pasangil nga namalit kini og botos.

Matud pa ni Chan nga si congressional candidate Mayor Arturo Radaza ug kapikas nga Paz Radaza nga nagpapiling mayor sa dakbayan nakalapas sa Omnibus Election Code.

Sumala niini ‘vote buying’ pinaagi sa paghatag og papel nga binuslotan nang daan tumong sa mga kandidato sa Deretso 3 nga anaa sa official ballot sa Comelec nga maoy isulod sa Precinct Count Optical Scan (COS) machines sa umaabot nga piniliay.

Nga kun iakob sa official ballots ang mga buslot tumong kaayo sa mga numero sa mga pangalan sa kandidatosa Deretso 3. Sumala pa ni Chan nga ang maong binuslotang papel gikatahong ihatag ngadto sa mga botante bisperas pa sa eleksiyon maoy basehanan sa pagpamalit sa boto ug paghatag sa bayad ngadto sa usa ka botante.

Gihulagway kini ni Chan nga sayop nga pamaagi sa pagtudlo sa publiko pagbotar ug naglaom si Chan nga maimbestigar ang maong kahiwian.

Samtang ang Comelec Officer sa dakbayan sa Lapulapu nga si Atty. Ferdinand Gujilde sa pakighinabi sa Banat News walay nakitang kalapasan sa gihimo sa kampo ni Radaza atol sa ilang gihimong “voters education” matag dapit nga ilang gibisita atol sa ilang pagpangampanya.

Ang kampo usab ni Radaza pinaagi ni Lapulapu City ABC President ug Pajo barangay Kapitan Leo Mercado wala mabalaka sa gipasakang reklamo ni Chan ngadto sa Comelec.

Matud pa niini katungod nila ni Chan ang moreklamo apan hugtanon niyang gipanghimakak ang mga alegasyong pamaagi kadto nila pagpalit og botos sanglit giisip nila kining usa lamang ka politikanhong estratehiya sa pag-angkon og daghang suporta gikan sa mga botante ug dili sa pagpalit sa mga boto niini. (BANATNEWS)