Sugat sa Mingla guwardyado sa kapolisan

CEBU, Philippines - Ang kapolisan sa lungsod sa Minglanilla andam na alang sa Sugat ug Kabanhawan Festival sa maong lungsod karong adlawa.

Si Chief Inspector Jovito Canlapan ang hepe sa Minglanilla Police Station nga nahinabi sa Banat News kagahapon mibutyag nga 35 ka mga polis nga naggikan sa nagkalain-laing police station ang idestino atol sa nahisgutang kalihukan karong adlawa aron sa pagmentinar sa kahapsay ug kalinaw.

Apan bisan pa niini ang hepe miawhag ngadto sa katawhan nga magmabinantayon aron dili mabiktima sa mga kiriwan tungod kay dili malikayan nga adunay mga kawatan nga magsuroy-suroy atol sa mga okasyon nga sama niini.

Giawhag usab niya ang katawhan nga dili magsul-ob og mga mahalon nga alahas, dili magdala og mahalon nga butang ug dili magdala og dakung kantidad sa kwarta kung motan-aw sa Sugat.

Sama sa mga milabay'ng tuig ang kalihukan sa Sugat anha gihapon ipahigayon sa Minglanilla Sports Complex sa Ward I, barangay Poblacion.

Matud ni Canlapan nga alas 4:00 pa sa kadlawon sugdan ang kalihukan sa Sugat ug ang mga tawo nga mosulod sa lugar panghilngon sa kapolisan ang mga bag ug kapkapan usab ang mga lalake pagsiguro nga wala silay dala nga mga hinagiban.

Adunay mga tanod nga motabang sa mga polis sa pagkapkap ug pagpanghiling sa mga bag.

Karong ala 1:00 sa hapon ipahigayon usab ang kalihukan sa Kabanhawan Festival sa lungsod diin adunay ipahigayong street dancing.

Si Canlapan midugang nga adunay rerouting sa mga sakyanan karon diin ang gikan sa Sugbo paingon ngadto sa habagatan anha paagion sa karsada sa barangay Lipata lahos ngadto sa barangay Tungkil ug Tungkop ug vice-versa. (BANATNEWS)