CEBU, Philippines - Ang tanang mga drayber ug konduktor sa mga bus pasaheroan gipahimangnoan nga ibutang sa kasigurohan ang ilang biyahe aron sa pagpanalipod sa kinabuhi sa mga pasahero.
Ang pahimangno gihimo ni Richard Corominas, ang Presidente sa Cebu Provincial Bus Operator Association (CPBOA) kinsa nagkanayon nga niining panahona nga magdasok ang mga pasahero kinahanglang labing mag-amping ang mga drayber sa pagdagan sa ilang mga sakyanan.
Sa samang higayon gipahinumdom ni Corominas nga dili angayang mag-inilugay sa mga pasahero ug dili usab magpaumento sa plitehan .
Labaw sa tanan dili angayang magpatuyang sa pagpadagan kay magdali sa destinasyon o kaha magginukdanay kay mag-ilog sa mga pasahero manakay sa kadalanan.
Kini tungod kay kasagaran sa mga sakyanan puno nang daan sa mga terminal ning siyudad una molarga paingon ngadto sa mga kalungsoran.
Matud pa ni Corominas nga sa biyahe sa mga sakyanan, ang kinabuhi sa mga pasahero anaa gisandig sa drayber nga magdala sa mga sakyanan. – BANAT NEWS