El Niño nakatampo sa sunog

CEBU, Philippines - Dako og natampo ang El Niño phenomenon kon huwaw sa nagsunodsunod nga mga sunog dinhi sa lalawigan sa Sugbo karong panahona sumala pa ni Fire Marshall Esmael Codilla sa Cebu City Fire Department.

Si Codilla kinsa maoy bugtong dinapit sa Camp Forum nga gisibya sa DYMR Radyo sa gobyerno sa miaging adlaw didto sa Baseline Restaurant nagkanayon nga ang pipila sa hinungdan sa pagdagsang karon sa sunog mao ang pagkausab sa estilo sa pagpuyo, dili maayong paggamit sa kuryente, pagkadanghag, ug uban pa.

Apan ibabaw niining tanan, ang pagkauga sa mga butang karon gumikan sa kainit sa panahon maoy nakadugang sa sunog sa nagkalainlaing bahin sa nasud ilabi na dinhi sa Sugbo.

Ang kainit sa panahon nakapainit usab sa tanang mga butang bisan ang anaa sa sulod sa panimalay, diin bisan sa kagamay sa kayo nga nataguwam-an sa tagbalay dali kaayong modakop ug mokaon sa nagkalainlaing mga butang sama sa papel, panapton ug uban pa sa sulod sa balay.

Gibatbat ni Codilla nga sa unang panahon dili kaayo tantong kusog ug dagko ang sunog kay wala pa kaayoy migamit og kuryente kaniadto.

Ang sobrang pagpaandar sa mga de kuryenteng mga butang sama sa mga appliances sa sulod sa balay, usa kini sa daling makapaulbo sa linya sa kuryente .

Maoy hinungdan nga gipahinumdom niya nga kun mogamit og plantsang de kuryente, bantayan pag-ayo nga dili kini mabiyaang nagtangag sa outlet kun wala na gamita.

Ang air-conditioning unit, mga bentilador, refregirator ug uban pa kansang mga plug ipaungot lang gihapon sa outlet bisan wala na gamita, maghatag usab og peligro nga mopaulbo og kayo sa sulod sa balay.

Ang mga sunog nga mugna sa kadanghag sa tagbalay maglakip sa walay pagpakabana paghiling sa hose sa gas stove, pagpaduwa sa mga bata og pusporo, pagpanigarilyo nga maghigda sa katre ug uban pa.

Sa laing bahin may mga sunog usab nga mugna sa arsonista , apan malisod kaayong pruybahon ang maong kaso, matud ni Codilla.

Hinuon mitug-an siya nga may usa ka polis karon nga nagtingkagol na sa prisohan gumikan kay napamatud-an kining sad-an sa kasong arson nga gisang-at batok kaniya.

Wala lang niya hinganli ang maong polis, apan usa kini sa kamatuoran nga ang arson usa usab sa mga hinungdan sa mga mahitabong sunog,

Busa tungod sa kadako sa suliran sa katawhan kun masunogan, higpit gyung gipahimangno ni Codilla nga angay gyud magbantay sa tanang panahon aron malikayan ang sunog. – BANAT NEWS