CEBU, Philippines - Giimbistigar dayon sa labaw'ng opisyal sa kapolisan sa dakbayan sa Talisay ang usa ka police trainee nga misipyat sa pagtangtang sa bala sa iyang M-16 rifle ug nadisgrasyang mibuto kini niadtong Martes sa buntag atubangan sa Talisay City Police Station.
Sa maong hitabo gibawian dayon sa armas si PO1 Rodel Monteza, kinsa ubos sa Field Training Program (FTP) nga mao pay paghuman sa iyang duty niadtong higayona ug wala niya matuyo ang maong hitabo.
Giangkon sa maong polis nga misipyat siya tungod kay imbes hulboton niya pag-una ang magazine niini una i-release ang usa ka bala, nabali man hinuon.
Si Monteza mibutyag nga kung mag-checkpoint sila o dunay mga operasyon kargahan nila og usa ka bala ang chamber sa ilang armas, ug inig-human sa ilang operasyon, i-release dayon nila ang maong bala paglikay sa disgrasya. Niadtong Martes gi-release niya ang magazine ug wala magdahum nga nahibilin sa chamber ang usa bala.
Sa iyang pagtuo nga wala na ang bala niini, gipaubos niya ang sumbohan sa armas ngadto sa yuta ug gikablit ang gatilyo niini dihang kalit kining mibuto.
Maoy hinungdan nga puwerting kurata sa iyang mga kaubang polis ug ang mga tawo nga nag-estambay didto sa parke. Si Senior Inspector Marlon Gumabao, Deputy Operation sa Talisay City Police Station diha-diha maoy midis-arma kaniya. Human siya bawii sa armas gimanduan usab siyang pa-eksplikahon ug ipaubos sa imbistigasyon. – BANAT NEWS