Magtiayon gipamusil

CEBU, Philippines - Samdan ang magtiayon human kini gipusil sa wala mailhing mamumuno pasado alas 9 sa miaging gabii sa sitio Biasong, barangay Bonbon ning siyudad.

Ang magtiayon nailhan nga sila Junrey Ibon,28 ug ang asawa niini nga si Roselyn, 24 nga molupyo sa nahisgutang lugar. Nasayran nga ang magtiayon nagkuyog gikan namalit og mga galamiton sa ilang panimalay kuyog niini ang anak nga nagpangedaron og 5-anyos ug ang igsuon ni Roselyn nga babaye nga si Nerissa Raghos.

Samtang ang magtiayon nagbaklay sa nahisgutang lugar kalit lang sila nakadungog og boto sa armas ug mao nalang usab ang nabantayan sa bana nga kalit lang nahagba ang iyang asawa.

Hinungdan nga iyang gitabang ang iyang asawa samtang kalit lang usab siya nga nakasinati og sakit sa iyang lawas diin iya usab nga nabantayan nga aduna usab siya samad pinusilan.

Ang duha uban sa ilang anak ug ni Raghos nakadagan pa paingon sa ilang panimalay aron mangayo og tabang sa ilang paryenti nga usa ka tanod nga si Pedro Alit.

Daling gidala sa Cebu City Medical Center ang duha human nakaangkon og samad pinusilan sa ilang tuong bukton.

Ang kapolisan nagsubay pa sa mga posibleng hinungdan sa pagpamusil kun wala ba kini kalambigitan sa mga personal nga panagbangi sa magtiayon.

Sa laing bahin samdan usab ang usa ka manindahay og isda human kini gidunggab sa duha ka tawo nga iyang kasakay sa PUJ pasado alas 9 sa miaging gabii sa dalan F. Llamas, barangay Punta Princesa.

Ang samdan nailhan nga si Eddie Morandante, 42, lumad nga taga Tuyan lungsod sa Naga ang nakaangkon og duha ka samad dinunggaban sa iyang bukobuko.

Nasayran nga ang biktima nagsakay og PUJ nga Naga-Basak diin iyang kasakay ang duha ka wala mailhing lalaki nga nahimutang sa tumoy nga bahin sa maong sakyanan.

Apan samtang nagdagan ang sakyanan nabantayan sa biktima nga ang duha nagsige og tan-aw kaniya hinungdan nga iya kini nga gisita ug giingnan nga “Ngano sige man ka tutok nako bay?”

Imbes ang duha ka lalaki morason daw gikasuko na hinuon niini ug sa diha nga mikanaog ang biktima ila kining gisundan ug gidunggab sa walay igong hinungdan. – BANAT NEWS