Palcuto mireklamo sa mikatap nga mga balota
CEBU, Philippines - Kandidato pagka-bise mayor sa dakbayan sa Sugbo nga si kanhi Col. Rico Palcuto mireklamo nga gidaot sa kaatbang sa piniliay pinaagi sa pagpakatap og sayop nga sample ballot nga gikan sa Commission on Elections.
Si George Chu, ang campaign manager ni Palcuto, nagkanayon nga nakita nila nga nagkakusog si Palcuto sa mga barangay sa siyudad sa Sugbo human nila makuha ang daghang sample ballot nga giilisan ang ngalan niini sa ngalan sa laing kandidato.
Sa maong sample ballot, matud ni Chu nga si Palcuto nahimutang sa ikatulo nga numero sa balota, bisan sa tinuod nga balota anaa kini sa ikalima nga numero.
Gipadayag hinuon ni Palcuto nga wala siya mabalaka niini tungod kay makamao mobasa ang mga botante.
“Ang importante, naa atong ngalan ug maoy ilang kuskoson sa ballpen ang lingin nga tupad sa atong ngalan kun mobotar sila ni Palcuto,” matud sa kanhi koronel nga giilang si “Mr. Nobody.” (BANATNEWS)
- Latest
- Trending
