Noynoy-Mar klarong modaog
CEBU, Philippines - Bisan og gidaot sila pag-ayo sa ilang mga kaatbang sa politika apan si Senador Benigno “Noynoy” Aquino III ug Senador Mar Roxas kinsa maoy kandidato sa pagka-presidente ug bise presidente sa Liberal Party (LP) mipadayag sa kasigurado sa ilang kadaugan karong umaabot nga election sa Mayo 10.
Kini sa dihang nasayran nila nga sila gihapoy nag-una sa labing bag-o nga survey nga gipahigayon sa duha ka mga surveyor nga mao ang Social Weather Station (SWS) alang sa Business World ug ni Pedro Laylo Jr. alang sa Manila Standard Today (MST) gikan niadtong Marso 19-22 ug Marso 21-23.
Sa survey sa SWS si Aquino nakakuha og 37 %, samtang si Roxas mikuha og 42%.
Samtang sa survey sa MST, si Aquino mikuha og 39%, ug ingon 39% usab ang kang Roxas.
Sa survey sa SWS si Senador Manuel Villar, kandidato pagka-presidente sa Nacionalista Party (NP) mikuha lang og 34%, samtang si Senador Loren Legarda nga maoy bise presidente sa LP mikuha usab og 24%.
Sa MST si Villar mikuha og 26 %, samtang si Legarda may 29 %.
Sila si kanhi Presidente Joseph Estrada mikuha lang og 19%, kanhi Defense Secretary Gilberto Gibo Teodoro 6 %, Senador Richard Gordon, 3%, Bro. Eddie Villanueva, 2 %. JC Delos Reyes 0.3 %, Nicanor Perlas, 1 % ug Senador Jamby Madrigal, .4%. (BANATNEWS)
- Latest
- Trending
