CEBU, Philippines - Namatay ang usa ka tawo human kini pusila samtang nagsakay sa iyang motorsiklo didto sa sitio Tikyan, sa barangay Banilad, dakbayan sa Mandaue sa miaging kaadlawon.
Ang namatay mao si Excell Pacana, 23, ulitawo, nga taga sitio Sacris, sa dalan M. L. Quezon, barangay Maguikay, dakbayan sa Mandaue.
Ang suspetsadong mipusil kaniya mao ang managsuong si Alberto Jumao-as, alyas Ondo, 25, ug ang iyang maguwang nga si Joevani Jumao-as, 29, ulitawo, nga pulos taga sitio Tikyan sa barangay Banilad sa nahisgutang dakbayan.
Ang mga nakasaksi sa maong hitabo maoy miila sa mga suspetsado.
Si PO3 Roberto Neri, imbestigador sa Mandaue City Police Office (MCPO) mibutyag sa Banat News nga gikan pang nanisko ang biktima sa sitio Tikyan, dihang sa iyang pagpauli luwan sa iyang motorsiklo kalit lang gibabagan sa managsuong suspetsado hinungdan sa pagkatagak niini gikan sa iyang motorsiklo.
Unya gipauwanan dayon sa mga bala ang biktima hinungdan nga wala na kini makabangon nga maoy hinungdan sa hinanaling kamatayon niini.
Gidala dayon ang biktima ngadto sa Mandaue District Hospital apan gideklarar kini sa mga doktor nga dead on arrival.
Si PO3 Neri miingon nga padayon pa nilang gipangita karon ang mga suspetsado kinsa nanibat dayon human sa maong hitabo. - BANAT NEWS