Hubog nagbisekleta nadasmagan trak de karga

CEBU, Philippines - Kritikal ang kahimtang sa usa ka 56 anyos nga hubog nga nagsakay og biseklita unya nadasmagan sa trak de karga    sa barangay Taytayan, siyudad sa Bogo niadtong Biyernes sa hapon.

Ang biktima mao si Cesario Maitom, 56, minyo nga taga barangay Cayam, Bogo.

Samtang ang nakadasmag niya mao ang trak de karga nga may plakang FCX-514 nga gipanag-iya sa Negros Movers Corporation ug gimaneho ni Harold Medida, 32, minyo, nga taga barangay Bato, dakbayan sa Sagay, Negros Occidental.

Si SPO2 Roel Leyson traffic investigator sa Bogo City Police Station mibutyag sa Banat News nga samtang nagdagan ang biseklitang giluwanan sa biktima sa national highway sa Taytayan, nagsunod usab niini ang de karga nga kargado sa tubo.

Apan dihang misuway og overtake ang de karga, nasaghiran niini ang biseklitang gisakyan sa biktima hinungdan nga misaliring ang biseklita ug nalagpot ang biktima ug pagtugpa niini nasugamak sa mga bun-og ug samad ang kalawasan.

Gihatod dayon ngadto sa Verallo District Hospital sa dakbayan sa Bogo ang biktima, apan may wala pa matinong taho nga namatay gyud kuno ang biktima tungod sa grabing kadaot sa lawas nga nahiagoman niini.

Hinuon ang suspetsadong drayber mitahan usab dayon ngadto sa kapolisan sa maong dakbayan ug nagkagulkol na siya karon sa prisohan. (Darrel A. Carumba)   (BANATNEWS)