Bloods member gipatay

CEBU, Philippines - Laing miyembro sa Bloods gang na usab ang namatay sa padayong pagbinawsanay sa mga gangs dinhi sa dakbayan, dihang ang biktima ug mga kaubanan gipaulanan og bala sa mga gituuhang sakop sa Crips Gang pasado ala-una sa hapon sa sitio Arca barangay Punta Princesa.

Ang namatay nailhan nga si Harley Labasano, 19, molupyo sa maong lugar ug giingong miyembro sa Bloods gang samtang ang mamumuno gituohan usab nga mga sakop sa karibal nga grupo.

Sa pakighinabi sa Banat News ni PO3 Geoffrey Gutual sa Homicide Section mibutyag nga ang biktima uban sa duha ka menor de edad naglingkod-lingkod sa usa ka lantay ubos sa dakong kahoy nga adunay 15 metros gikan sa ilang panimalay.

Matud pa nakadungog nalang sila og sunod sunod nga buto sa armas gikan sa ngitngit nga bahin ug nanglapos ang bala sa isi’g ka kilid sa biktima, wala na kini makaabot nga buhi pa sa Cebu City Medical Center.

Nagduda ang kapolisan nga away sa mga gang gihapon ang unang nakita nilang hinungdan sa pagpamusil. - Lesley Caminade