CEBU, Philippines - Si Capitol Consultant on Information Atty. Rory Jon Sepulveda nagkanayon sa sunod semana pa ma-release sa buhatan ni Gob. Gwendolyn Garcia ang resulta sa imbestigasyon sa Kapitolyo may kalambigitan sa kontrobersiyal nga pagkapalit sa lote sa Balili properties nga naglubog sa tubig dagat ug kabakhawan.
Matud pa ni Sepulveda nga si Garcia gikatakda na unta sa pagpublikar sa resulta sa imbestigasyong gihimo ni National Bureau of Investigation - 7 regional director Medardo Delemos karong semanaha apan napakgang kini tungod sa kasikas sa politika.
Kini partikular ang paggawas sa report nga ang mga opisyales sa One Cebu Party mibiya na pagsuporta kang Lakas-Kampi-CMD presidential candidate Gilbert Teodoro ug mitapon sa kandidato ni NP presidential candidate Sen. Manny Villar.
Si Sepulveda miingon nga anaa na sa iyang mga kamot ang kopya sa resulta sa maong imbestigasyon ug andam na unta kining ihatag ngadto sa sakop sa media.
Apan iyang giklaro nga wala siya’y awtoridad sa pag-release niini sanglit si Gob. Garcia wala man nihatag kaniya og kamanduan nga ipagawas ang maong report.
Tungod kay karong adlawa mao na man ang sinugdanan sa campaign period alang sa mga local nga kandidatura ug ang mga kandidato sa One Cebu mopahigayon sa ilang opening salvo sa pagpangampanya, hayan ang pag-release sa maong dokumento mapagawas na kini sa sunod na nga semana. - BANAT NEWS