Mga kolorum bantayan sa LTO atol sa Semana Santa

CEBU, Philippines - Mopakatap ang Land Transportation Office og mga ahenteng manakop niadtong mga kolorum nga taxi, jeepneys, minibuses ug buses nga mamentaha og mga pasahero nunot niining nagkaduol nang paghinumdum sa Semana Santa.

Si Ed Catarungan, assistant regional director sa LTO-7 nagkanayon nga matag dunay okasyon sagad usab mogara ang mga kolurom nga mga pasaheroan, kini nagbutang sa peligro sa mga pasahero ug kalapasan sa ilang mga prangkisa gikan sa Land Transportation Franchising and Regulatory Board (LTFRB)-7 samtang duna pay uban nga mamasahero bisan wala silay prangkisa.

Matud pang Catarungan nga dili covered sa insurances ug uban pang benipisyo ang mga pasahero sa higayon nga madisgrasya kini sa kadalanan. Mipasidaan si Catarungan sa publiko base sa ilang mga nangadakpan kaniadto nga sagad sa mga kolurom nga sakyanan mga karaang modelo ug kinopya ra sa mga badlungong operators ang sequence number sa body sa taxi aron kunohay dili mabantayan sa mga ahente.

Pipila niining mga kolurom (sagad mga taxi) gi-impound na sa LTO-7 ug hangtud nga dili mabayran ang dakong multa sa mga tag-iya dili nila kini iuli. – BANAT NEWS