Tomas gihagit og debate ni Kong. Alcover

CEBU, Philippines - Gihagit og debate ni ANAD Partylist Representative Pastor “Jun” Alcover si Cebu City Mayor Tomas Osmeña kabahin sa isyu sa pagsuporta sa mayor og mga kandidatung gihulagway niyang sakop sa walhong pundok.

Si Alcover nagkanayon nga ang paghatag og pasidungog sa mayor kanila ni Bayan Muna Partylist Representative Satur Ocampo sa milabay'ng kasaulogan sa Cebu City Charter Day niadtong petsa 24 sa Pebrero.

Gihulagway ni Alcover nga usa ka “ignorante”ang mayor tungod sa padayong pagdepensa sa mayor nga sakto ang paghatag sa siyudad og pasidungog kang Ocampo. Sumala pa niya walay kabangkaagan sa gubat sa kagamhanan batok na sa mga rebeldeng Communist Party of the Philippines-New Peoples Army kon CPP-NPA ang mayor, ug mipahinumdum nga si Ocampo maoy usa sa mga gikasuhan kalabot sa masaker sa Leyte pipila na ka tuig ang nakalabay.

Labaw nang natandog ang kongresista sa pamahayag sa mayor nga naghulagway sa Bayan Muna nga buotang molupyo ug gipasigarbo pa sa mayor nga iyahang napugngan ang posibleng kasamok dihang mipatuo ang mga militante sa iyang hangyo nga di molusad og protesta atol sa 12th ASEAN Summit dinhi sa Sugbu.

Ang mayor sa sayo pa miingong dili angayang tagdon ang mga pamahayag ni Alcover sanglit mas gipalabi niini ang dakong nahimo sa mga militanteng wala pagsamok atol sa summit nga wala mahisusama sa 13th ASEAN Summit sa Thailand nga nagbutang sa maong nasud sa kauwawan.

Si Alcover mi-deklarar og political war ngadto sa Bando Osmeña Pundok Kauswagan BOPK nga gidumala ni Osmeña isip founder ug mipadayag nga wala siya mahadlok sa pamahayag sa mayor nga dili suportahan ang iyang partylist.

Samtang hasta ang paghatag og financial assistance sa mayor nga P4 mil sa mga senior citizens gisaway usab ni Alcover ug mihulagway nga daw limos kining gihatag.

Sumala pa niya nga kun seryoso pa gyud ang mayor magpatukod unta kini og tambalanang dunay maayong serbisyo ug dili lang mga tiguwang ang makapahimulos kundili alang sa tanan. – BANAT NEWS