Mikuha sa motor sa bayaw nadasmag patay

CEBU, Philippines - Patay ang usa ka lalaking ‘mikawat’ sa yawe sa usa ka motorsiklo human kini mabangga diha sa Maximo Patalinghug Avenue sa barangay Gun-ob dakbayan sa Lapulapu sa milabay'ng hapon.

Ang biktima mao si Ralph Waldo Basillo Salazar, 34, residente sa sitio Bagumbayan, sa Maribago sa maong dakbayan nga sumala pa sa bayaw niining si Raymund Pariel mikuha sa yawe sa iyang motor nga walay pananghid.

Matud pa niini nga nag-inom sila niadtong tungura ug gumikan sa iyang kahubog nakatulog kini ug diha nakahigayon ang biktima sa pagkuha sa iyang yawe sa motor ug gimaneho kini bisan walay lisensya.

Pipila ka oras, ilaha nalang nasayran nga nabangga kini sa center island sa maong dalan ug namatay.

Gikumpirmar ni PO2 Johnny Hernandez sa Traffic Division nga walay lisensya ang namatay, ang motor ni Pariel kasamtangang gi-impound sa kapolisan. – BANAT NEWS