Kapolisan andam na sa local campaign karon

CEBU, Philippines - Gipangandaman na sa kapolisan sa probinsya sa Sugbo ang pagsugod sa local campaign karung adlawa.

Matud pa ni Cebu Provincial Police Director Erson Digal nga naglakip niini ang pagbutang og dugang pwersa sa kapolisan ug ang pag-andam og reserbang tropa nga mapadala kun gikinahanglan.

Duha ka kompanyang polis ang giandam diha sa lungsod sa Samboan nga maoy moabag sa habagatang kalungsoran samtang usa ka kompanyang polis ang gibutang sa Bogo aron moabag usab sa amihanan.

Samtang mimando usab si Digal sa tanang hepe sa nagkadaiyang estasyonan sa paglista sa mga police personnel nga adunay igsuon o paryenteng mikandidato kini aron ibalhin sa laing dapit. Mipahimangno siya sa mga sakop nga di magapil-apil sa pangampanya bisan na kadtong gidestino isip police escorts apan wala magdili kanila pagdawat og mga mangampanya diha sa ilang police stations.

Pinaagi niining local campaign period naglaom ang kapolisan nga maklaro na nila unya ang mga dapit nga ilahang ikunsiderar nga ‘hot spots’ base unya sa mga kagubot nga mahitabo atol sa local campaign.  – BANAT NEWS