Nacionalista ug Kusug nag-alyansa

CEBU, Philippines - Pormal na nga gilusad kagahapon sa hapon ang panag-alyansa tali sa Kugi Uswag Sugbo (KUSUG) nga gipangulohan ni kanhi Cebu City mayor Alvin Garcia ug Nacionalista Party nga gipangulohan ni presidential candidate Manuel Villar.

Ang maong kalihukan nga gipahigayon sa Marco Polo Hotel sa barangay Lahug, dakbayan sa Sugbo gitambongan sa mga supporter ug kandidato ubos sa KUSUG nga naglakip kanila ni Jonathan Guardo kinsa mikandidato isip kongresista sa south district, Mary Ann Delos Santos sa north district ug kanhi Cebu City Councilor Rodolfo Cabrera kinsa mikandidato karon isip konsehal sa dakbayan sa Sugbo ug Raymond Garcia.

Si Villar ug Garcia nagpinirmahay usab sa kasabotan alang sa ilang panaghiusa.

Sa laing bahin si Villar nakigtagbo usab sa mga kongresistang Sugbuanon nga naglakip kang Kongresista Eduardo Gullas, Nerisa Soon-Ruiz, Pablo Garcia, Pablo John Garcia, Benhur Salimbangon ug Luigi Quisumbing .

Matud niya nga wala sila'y mga dagkong butang nga gihisgotan, apan pulos lang inamigo ang tanan tungod kay nasayod siya nga ang ubang mga kongresista tua man sa laing kandidato pagka-presidente mosuporta.

Gibutyag usab ni Villar nga wala siya'y gihatag nga pinansiyal nga tabang ngadto sa KUSUG gawas lang sa ilang pagpalig-on sa ilang grupo.

Miingon siya nga nagkinahanglan pa siya og dugang nga kaalyado sa ubang mga lugar sa nasud.

Lakip nga nakigtagbo kang Villar kagahapon mao ang mga mayor nga sakop sa unang distrito sa probinsiya nga sila si Mayor Socrates Fernandez sa dakbayan sa Talisay, Eduardo Selma sa lungsod sa Minglanilla, Valdemar Chiong sa dakbayan sa Naga, Cesar Baricuatro sa lungsod sa Dumanjug ug Ahong Chan sa dakbayan sa Lapulapu. – BANAT NEWS