Gibo klaro nang mapresidente

CEBU, Philippines - Gipadayag ni kandidato pagka-presidente Gilberto “Gibo” Teodoro nga bisag unsay mahitabo ipadayon niya ang iyang kampanya alang sa iyang kadaugan sa Mayo 10 nga election.

Kini maoy iyang tubag sa mga pangutana sa mga tigbalita bahin sa hunahuna niya sa labing bag-ong resulta sa survey diin siya mao nay nag-una sa tanan niyang mga kaatbang.

Si Gibo kinsa maoy standard bearer sa Lakas Kampi-CMD party madasigon kaayong nakig-atubang sa mga bankers ug uban pang dagkong negosyante didto sa Dusit Thani Hotel sa Makati atol sa national covention sa Chamber of Thrift Banks of the Philippines sa miaging adlaw.

Didto gituki ni Gibo ang mga isyu bahin sa mga reporma sa pamangko ug uban pang mga isyu nga may labot sa mga laraw niya alang sa pagpalambo sa ekonomiya sa nasud.

Didto gipasabot ni Gibo nga kun nangharos siya sa labing awahing survey sa Campaigns and Image Group, kini nagpasabot nga human na ang hukom sa mga katawhan.

Nasuta na sa mga Pilipino nga ang una, ikaduha ug uban pa nilang gipili nga mga kandidato sa pagka-presidente samtang wala pa ang election, dili makasarang sa iyang katakus ug kapabilidad sa pagdumala sa nasud nga Pilipinhon.

Nasuta ni Gibo nga gikan sa mga propesyonal akademya, mga intelihenteng tawo, mga negosyante ug tanang mga desenting tawo, pabor sa iyang kandidatora kansang abilidad dili hitupngan sa tanan niyang mga kaatbang sa susamang kandidatura.

Gumikan niini wala nay laing gilantaw si Gibo gawas sa kasigurohan nga sa umaabot nga Mayo 10, siya na ang motumaw nga bag-ong presidente sa nasud nga Pilipinhon. – BANAT NEWS