Ombud-Visayas nagsusi's 'ill-gotten wealth' ni Koko

CEBU, Philippines - Gisugdan na sa buhatan sa Ombudsman Visayas ang ilang imbistigasyon batok sa hepe sa Customs Intelligence and Investigation Service sa Bureau of Customs dinhi sa Sugbo tungod sa giingong paghipos og mga “ill-gotten wealth.”

Ang Ombudsman Visayas misugod sa ilang pagpahigayon sa lifestyle check batok ni Manlalaban Rico Rey Francis Holganza bisan pa sa iyang hangyo nga susihon una kun dili ba peke ang misang-at og reklamo batok niya.

Si Assistant Ombudsman Virginia Palanca-Santiago miingon nga wala na kinahanglana nga ilang susihon kun peke o dili ba ang reklamante tungod kay wala ni kinahanglana.

Gipasabot ni Santiago nga ang Ombudsman makahimo og imbistigasyon basi lang sa anonymous complaint o ba kaha sa report sa mantalaan. Sumala pa ni Santiago nga klaro ang maong mandato diha sa Republic Act 6770 kon ang nailang Ombudsman Act.

Matud ni Santiago nga nagsugod na sila sa pagpanghipos og mga dokumento may labot sa giingong ill-gotten wealth ni Holganza. Kini naglakip sa pasangil nga siya nagbaton og usa ka tulo ka andana nga building diha sa Barangay Mambaling ug usa ka mansion diha sa Sto. Nino Village sa Barangay Banilad.

Kun mahinumduman usa ka Hans Ernest Tan Aparice ang misang-at og reklamo didto sa Ombudsman batok ni Holganza tungod sa giingong pagbaton niini og kwestiyonable nga mga katigayonan.

Gawas sa mga pinuy-anan si Holganza giingong nanag-iya sab og daghang mga luho nga mga sakyanan ug kayutaan bisan kun P14 mil ray sweldo niini matag buwan. Ang pasangil kusganon hinuon nga gihimakak ni Holganza. Matud niya nga dili tinuod nga nanag-iya siya og mansion diha sa Sto. Niño Village.

Iyang giangkon nga duna siya'y balay sa Mambaling apan matud niya iya ning inutang sa Government Service Insurance System niadtong konsehal pa siya sa dakbayan sa Sugbo.

Miangkon sab si Holganza nga nanag-iya og usa ka gatos ka ektarya nga yuta didto sa Bantayan Island apan matud niya iya ning sinunod sa iyang inahan. – BANAT NEWS