'Killer' ni Allan Dizon giabswelto

CEBU, Philippines - Giabswelto sa Court of Appeals ang suspek sa pagpatay sa photojournalist sa Banat News ug The Freeman nga si Edgar Belandres gumikan sa nakitang kahuyang sa pamahayag sa mga testigos.

Ang giabswelto mao si Edgar Belandres, kinsa nahukmang mabilanggo sa tibuok kinabuhi sa sala ni Regional Trial Court (RTC) Judge Ireneo Lee Gako.

Si Dizon gipusil patay diha duol sa usa ka dakong department store sa North Reclamation Area niadtong Nobiyembre 27, 2004. Si Dizon ug Belandres gikatahong managkaila sa ilang gipuy-an sa Barangay Lorega San Miguel.

Tulo ka mga testigos nga nangangkong nakakita sa pagpusil patay kang Dizon ni Belandres diha sa dalan A. Soriano St. mitumbok nga gihubo sa suspek ang helmet sa dayon niining pusil sa tigbalita. Ug daling miikyas sakay sa motorsiklong gimaneho og laing lalaki.

Sa report sa TV Patrol Central Visayas kagahapon sila si Court of Appeals Associate Justice Samuel Gaerlan sa ilang desisyon miingon nga nakakita sila og kahuyang sa testimonya sa mga testigos batok kang Belandres aron magpalig-on sa akusasyong siya maoy mipatay kang Dizon.

Ang hearing gipahigayon diha sa sala sa 12th Division Court of Appeals niadtong Marso 15.

Ang kapikas ni Dizon nga si Amy Dizon sa samang report nasagmuyo sa resulta sa maong kaso ug mipadayag nga wala na siya masayod kung unsay buhaton sa maong kaso.

Samtang nabalaka karon ang biyuda ni Dizon nga sila panimaslan lakip na ang tulo nila ka testigo karong nakagawas na si Belandres. -  BANAT NEWS