Kinihaay sa Lapu

CEBU, Philippines - Mga kandidato sa Nationalist Peoples Coalition (NPC) sa dakbayan sa Lapulapu ug mga opisyal sa barangay Bankal magkinihaay gumikan sa kagubot nga nahitabo atol sa ilang rally sa milabay'ng Domingo sa udto.

Matud pa ni Bankal barangay kapitan Mario Inoc nga nahinabi sa Banat News niadtong milabay’ng Domingo sa udto petsa 21 nag-rally ang NPC pinangulohan ni NPC mayoralty candidate Junard “Ahong” Chan ug konsehal Rufo Bering uban sa ilang bisitang kandidato pagka-senador Satur Ocampo ug Liza Masa.

Sa kalit lang, mitumaw ang kagubot human gipangguba sa mga supporters niini ang mga bangko ug sound system sa maong barangay ug gibukbok ang ilang barangay treasurer nga si Mario Aying.

Matud pa ni Inoc nga atol sa pagpangayo og permiso sa grupo ni Ahong ilaha kining gibalibaran tungod kay adunay liga sa basketball sa kabataan, apan gitugutan kini sa pagmontar og stage duol sa maong complex.

Atol sa pakigpulong ni Satur Ocampo kalit nga mitingog ang trompa sa maong barangay nga ang jingle sa partidong “Diretso” nga iya sa kampo ni Radaza ang milanog hinungdan sa kasuko sa mga supporters sa NPC ug diha na nagsugod ang giingong pagpangguba sa mga bangko ug speakers sa sound system sa barangay.

Gikatahong atol sa kagubot gibukbok si Aying og botelya sa mineral water ug gipatiran sa likod dayon giingong gibunlot ni Rufo Bering ug gitulisok.

Apan sila si Chan ug Bering mihulagway nga usa ka sabotahe ug pagbugalbugal ang gihimo sa kampo ni Radaza kanila pinaagi sa pag-insulto kanila atubangan sa ilang mga bisitang magpapiling senador.

Ang maong insidente hugot nga gipanghimakak sa mga opisyal sa barangay sanglit si Aying nga maoy nagpatukar sa DVD player miinsister nga wala siya masayod nga campaign jingle sa ilang partido ang napasok niini dihang iyang gipatukar.

 Nangangkon kining iya lang gipreparar ang sound system alang sa meeting sa barangay ug dihang iyang giablihan ang player mitukar kini.

Matud pang Inoc, 36 ka mga bangko sa barangay ang naguba, duha ka speakers ang nangawala lakip na ang DVD player.  -  BANAT NEWS