Minibus operators suporta ni Davide

CEBU, Philippines - Mipadayag sa ilang suporta kang gubernatorial candidate Hilario “Junjun” Davide III sa Liberal Party ang mga sakop sa Cebu South Minibus Operators Association atol sa ilang panagtigom kagahapon sa buntag diha sa Sacred Heart Center nga gitambongan sa 38 ka minibus operators nga dunay 129 ka regular nga miyembro.

Si Julito Flores, presidente sa minibuses nagkanayon nga silang mga operators wala nay luna sa Kapitolyo ug gihulagway nga giyaga-yagaan lang sila ni Gob. Gwendolyn Garcia.

Wala mahimuot si Flores niadtong gihimo kanila sa igsuon sa gobernadora nga si Byron Garcia nga maoy nagdumala sa Cebu South Bus Terminal nga giingong maoy gidapigan sa gobernador.

Ang mga minibus operators gikabangi ni Byron Garcia niadtong Nobiyembre tungod sa pagpamasahero nila gawas sa terminal, pipila sa ilang mga drayber ang gipadakop hinungdan nga midangop usab sila sa dakbayan sa Sugbu.

Samtang gipadayag usab ni Flores ang ilang wala pagkauyon sa mga isyung mihamok karon sa mga Garcia sama sa gikwestyong donasyon sa dancing inmates nga nagkantidad na og minilyon ka pesos ug ang pagkuha sa Kapitolyo og mga gwardyang iya gihapon sa mga Garcia diha sa terminal ug sa Kapitolyo.

Ang paghatag og pagtugot sa Kapitolyo sa Ceres Bus nga gipanag-iya sa Villacar Transit nga maka-operate sa kalungsoran sa habagatang bahin sa lalawigan nga nakaapekto na sa ilang kinitaan.

“Dili na siya (Gobernador) magmahay kay amo siyang gisuportahan sulod sa duha ka termino, ang mga Garcia naghupot sa Kapitolyo mokabat nag 30 ka tuig,” matud pang Flores.

Atol sa maong tigom kagahapon miduso og manifesto kang Davide pagpadayag sa ilang suporta ang mga operators ug usa sa ilang sugdan og buhat mao ang pagbutang sa tanan nilang minibuses og yellow ribbon ug stickers timaan sa ilang pagsuporta kang Davide.

Si Davide sa iyang bahin mapasalamaton sa dakong suporta nga gihatag sa mga minibus operators sa iyang kandidatura karung piniliay sa Mayo. -  BANAT NEWS