Oaminal kuli nang mobalik sa DDB

CEBU, Philippines - Wala nay plano pa si kanhi Dangerous Drugs Board DDB undersecretary Paul Clarence Oaminal nga mobalik sa pagka vice chairman sa DDB.

Si Oaminal dihang nahinabi sa Banat News miingon nga nadawat na niya ang iyang gidangatan ug tutukan nalang una niya ang pagtabang sa kandidatura sa mga gisuportahan niyang kandidato sa umaabot eleksiyon karung Mayo.

Si Oaminal dayag misuporta sa Bando Osmeña Pundok Kauswagan ug sa kanhi chairman sa DDB nga si kanhi senador Vicente Sotto III nga nagpapili og balik pagka senador.

Dugang ni Oaminal nga gawas niini duna pa siyay daghang gimbuhaton sama sa pagtiwas sa iyang mga libro nga himuon ug ang pagpadayon sa adbokasiya batok sa ilegal nga drugas bisan usa na siya ka yanong tawo.

Matud pa niya padayon siyang mag-monitor sa mga nangasakmit nga mga cocaine sa Davao City ug Boronggan Eastern Samar nga nakasulod na usab dinhi sa Sugbu.

Samtang anha na siya modesisyon sa tanyag ni Mayor Tomas Osmeña nga pangulohan ang City Office of Substance Abuse Prevention inig ka human sa eleksyon. - Darrel Carumba (BANAT NEWS)