Mindanao rob group nangabot

CEBU, Philippines - Gialerto sa kapolisan sa lalawigan ug sa dakbayan sa Sugbu nunot sa nadawat nga impormasyong dunay nangabot nga grupo sa mga tulisan dinhi gikan sa Mindanao.

Matud pa ni Sr. Insp. Michael Anthony Bastes, hepe sa Theft and Robbery Section duha sa maong mga grupo ang nailhan na ug mipahimangno sa mga negosyante sa pagmatngon.

Ang modus operandi sa grupo mao ang pagtulis sa mga mo-withdraw sa bangko ilabi na niadtong mokuha og payroll, ang kapolisan mipahingusog na sa ilang pagpatrolya sa mga dapit nga gikahimutangan og mga bangko sukad pa niadtong milabay’ng semana.

Si Cebu City Police Office director Patrocinio Comendador mimando na sa mga sakop sa pagdala gyud og tag-as nga armas sa ilang pag-roving.

Samtang si Cebu Provincial Police Director Erson Digal mimando usab sa hepe sa kapolisan sa lalawigan sa pag-aligmat tungod gihapon sa maong impormasyon.

Gimandoan usab ni Digal ang tanang hepe sa kapolisan sa kalungsoran sa pagpahigayon og mga checkpoints samtang ang mga sakop sa Special Reaction Unit pagtabang sa pag-roving. - Lesley Caminade (BANAT NEWS)