Sakyanan ni SOC nadasmagan og motor

CEBU, Philippines - Sakyanan ni Mayor Socrates Fernandez nadasmagan og motorsiklo nga miresulta sa pagkaangol sa drayber nga nakadasmag apan si Fernandez napaso usab sa kamot tungod sa pagtabang sa nakadasmag kaniya kagahapon diha sa may junction sa barangay San Isidro ug Cebu Coastal Road kagahapon sa udto.

Dali usab nga gidala sa tambalanan ang drayber sa motorsiklong si Labrado Collin Lao,36, taga Rupina Arcade sa dalan N. Bacalso samtang si Fernandez wala na magpadala sa tambalanan.

Sa pakighinabi sa Banat News kang PO2 Lino Diez, gikatahong si Lao padulong sa habagatang bahin sakay sa iyang Skygo nga motor subay sa South Coastal Road samtang ang mayor padulong nang moliko gikan sa City Hall dihang kalit nga misampak ang motorsiklo sa tuong bahin sa likod nga parte sa iyang sakyanan.

Tungod niini daling migawas sa sakyanan ang mayor ug mao nalay nakit-an si Lao nga naghigda sa dalan ug motorsiklo nga napasok sa ilawom. Gisuwayan pagbitad ni Fernandez ang motorsiklo aron makuha si Lao apan ang tambutso hinuon ang nakuptan niini.

Matud pang Diez nga human mahulbot sa mayor si Lao dali niya kining gidala sa Talisay City District Hospital tungod sa pagkaangol sa duha ka tiil niini.

Si Diez nagkanayon, base sa pamahayag ni Lao kaniya nga kusog gyud ang iyang padagan niadtong tungura ug sa iyang tan-aw sa traffic lights green pa apan pagkaduol sa junction orange na kini padulong sa pag-stop.

Wala na siya makabantay nga ang sakyanan sa mayor padulong na usab og liko hinungdan nga napasok siya sa sakyanan niini. Hinuon ang mayor mipasalig nga abagahon ang galastuhan sa tambalanan ni Lao.

Samtang gihimakak ni Diez ang pasangil nga giikyasan sa mayor ang aksidente sanglit mao pa kini mismoy mihatud sa biktima sa tambalanan. (BANATNEWS)