Oaminal gitanyagan ni Osmeña

CEBU, Philippines - Gitanyagan ni Mayor Tomas Osmeña ang bag-ohay lang gitaktak nga kanhi vice chairman sa Dangerous Drugs Board Paul Clarence Oaminal nga maoy mangulo sa City Office of Substance Abuse Prevention (COSAP).

Si Osmeña namahayag niini atol sa press conference sa mga tigbalita human masayri sa pagtaktak ni Presidente Gloria Macapagal Arroyo kang Oaminal gikan sa DDB.

Wala pa hinuon masayri ang tiunay nga rason sa pagkataktak ni Oaminal apan nagduda kining posibleng nagpaluyo niini ang politika.

Si Oaminal gihulipan sa kababayan ni Arroyo nga si DDB vice chairman for administration nga si Rommel Garcia. Si Oaminal miangkong nadismaya gyud siya sa pagkatangtang sanglit daghan pa siyang mga programang nangatanggong.

Matud pa ni Osmeña nga ilang hangpon ang kahigayonang makuha ang serbisyo karon ni Oaminal tungod sa kaaktibo niini sa kampanya kontra ilegal nga drugas.

 Ang mayor mimando na kang Konsehal Agustus Pe Jr. nga pakigkitaan si Oaminal aron hisgutan ang tanyag nga pangulohan ang COSAP nga sa pagkakaron gihuptan ni Joeling Lazarte.

Ang COSAP maoy programa sa dakbayan kontra kalihukan sa ilegal nga drugas aron pag-abag sa kapolisan. Lakip sa gimbuhaton sa COSAP ang pagpahigayon og mga anti-illegal drug seminars sa kabarangayan ug mga surprise drug testings sa mga kawani sa city hall ug sa kabarangayan.

Si Oaminal sa iyang bahin mihangop sa tanyag sa mayor ug mapasalamaton siya niini apan mipasabot nga dili pa niya kini madawat karon dayon.

Sumala pa ni Oaminal padayon pa niyang gitiwas ang mga gimbuhaton niya sa DDB ug malaumong mabalik siya sa pwesto. Gikatahong hasta si kanhi Senador Vicente Sotto nga kanhi tsirman sa DDB nasurpresa sa desisyon pagtaktak kang Oaminal ug misaad nga ugkaton ang ugat niini.

Si Oaminal nagkanayon nga sa pagkakaron busy siya sa pagsuporta sa kampanya ni Sotto ug motutok usab sa pagsuporta sa kampanya ni Osmeña. (Edwin Ian Melecio ug Rene Borromeo sa The Freeman)   (BANATNEWS)