Manag-uyab gitulis, motor gikuha sad

CEBU, Philippines - Manag-uyab gitulis ug giilogan sa ilang sakyanan sa tulo ka mga gidudahang tulisan diha sa ilawom nga bahin sa 2nd Mactan Mandaue Bridge sa barangay Umapad, dakbayan sa Mandaue sa milabayng adlaw.

Ang biktima mao si Jimboy Gelig, 24, taga barangay Agus, dakbayan sa Lapulapu ug ang uyab niining si Janet Macabangkit, 24, taga barangay Umapad dakbayan sa Mandaue.

Sumala pa sa imbestigasyon sa Presinto 5, naglingkod ug nag-estoryahanay ang duha dihang giduol sa tulo ka mga lalaki ug dayon gitionan og pusil.

Ang duha wala nay nahimo sa dihang gikuha sa mga lalaki ang ilang mga cellphone, pitaka ni Gelig ug lakip ang motorsiklo niining usa ka Honda Wave 125 nga adunay plakang YD 4366.Daling mipahilayo sa maong dapit ang mga tulisan. (Bong Soriano)   (BANATNEWS)