Naghikog! Kay gibiyaan sa iyang kapuyo

CEBU, Philippines - Patay ang usa ka 21-anyos nga lalaki human kini maghikog gamit ang usa ka nylon nga pisi nga gihigot sa iyang liog niadtong Sabado sa gabii diha sa barangay Poblacion Ward II, lungsod sa Minglanilla tungod kay gibiyaan sa iyang kapuyo tungod sa kalisod sa ilang panginabuhi.

Si Gabriel Lenrod dela Cerna naabtan sa iyang amahan nga si Rodrigo dela Cerna nga nagbitay sulod sa ilang balay.

Si PO2 Humpre Alpas, duty desk officer sa Minglanilla Police Station kagahapon nagkanayon si Gabriel ug ang kapuyo niini nga si Sheralyn Lavapes nga adunay duha ka anak nagkabulag.

Kini sa dihang si Gabriel gibiyaan ni Sheralyn human kini wala na makasustenir sa panginahanglanon kanila tungod kay wala kini permanenteng trabaho.

Niining bag-o lang, sa pagbiya ni Sheralyn sa panimalay sa mga dela Cerna, si Gabriel nagmagul-anon ug giingong masige og padala og mensahe sa text ngadto sa kanhi niya kapuyo nga maghikog siya apan wala lang kini panumbalinga ni Sheralyn.

Si Gabriel gidala unta sa Minglanilla District Hospital apan wala na kini makaabot nga buhi. – BANAT NEWS