AKRHO man gipatay

CEBU, Philippines - Patay ang usa ka 31-anyos nga sakop sa Alpha Kappa Rho human kini pusila diha sulod sa iyang payag sa wala mailhing tawo kagahapon sa kadlawon diha sa Phase 3B, Block 3 Lot 10 Camella Homes, barangay Lawaan I, dakbayan sa Talisay.

Ang biktima giila sa mga polis nga si Dante Cabrera, residente sa nahisgutang lugar nakaangkon og samad pinusilan sa agtang ug walang hawak nga maoy gituohan sa iyang kamatayon.

Sila si SPO1 Ricardo Balbutin, PO2 Epifanio Comendido Jr. ug PO1 Rusty Pelayo sa homicide section sa Talisay City Police Station ang daling miresponde sa maong hitabo.

Si Comendido sa pakighinabi niini sa Banat News kagahapon mibutyag nga ang kanhi kapuyo ni Cabrera misulti ngadto kanila nga ang biktima kinsa  estambay giingong usa ka sakop sa Akrho (AKRHO) ug nalambigit kini sa pagpanguha og mga kable sa kuryente, telepono ug cable apan wala hinuon kini record diha sa police station nga dunay gibuhat nga mga kalapasan sa balaud.

Sa wala pa mahitabo ang insidente niadtong Sabado sa gabii si Cabrera uban sa iyang mga higala nga sila si Danny Espinosa, Diodito Castillo ug Milky Gimena nga nag-inom diha duol lang sa payag sa biktima apan namalhin kini ngadto sa duol nga tindahan.

Pagkahuman nila og inom mga alas 2:00 sa kadlawon nagbuwag-buwag og pamauli ang upat kinsa si Cabrera ang natulog na usab diha sulod sa iyang payag apan kalit dunay duha ka buto sa pusil ang nabati-an sa amahan sa biktima nga si Lorenzo diha sa payag sa anak niini. Matud ni Comendido nga si Lorenzo miduol sa payag sa iyang anak ug milili diin nakita niini ang anak nga naghigda sa kama ug giingong naghagok apan matud sa polis nga posibleng nag-ago na sa kasakit sa mga samad pinusilan ang biktima ug wala lang maklaro og pamati sa amahan niini.

Kagahapon sa alas 7:00 sa buntag ang tulo ka mga higala ni Cabrera mianha sa iyang payag tungod kay nianang pagkagabii duna silay sabot nga magsugba-sugba pagkabuntag apan mao na lay nakita sa tulo ka higala sa biktima nga nagkadugo na kini nga naghay-ad diha sa kama.

Ang tulo ka mga higala ni Cabrera daling mipahibawo kang Lorenzo kinsa ang balay diha lang usab sa duol nga susihon ang iyang anak.

Sa maong sitwasyon diha pa mahibaw-i nga si Cabrera diay ang gipusil sa wala mailhing kriminal. – BANAT NEWS