Oaminal gipulihan na isip DDB Asst. Sec.

CEBU, Philippines - Gihulipan na ni Presidente Gloria Macapagal Arroyo si Dangerous Drugs Board acting secretary Paul Clarence Oaminal subay sa suwat nga gipadala sa executive director sa DDB pinetsahan og Marso 19, 2010.

Hinuon wala kini makapakgang kang Oaminal pagpadayon sa iyang adbokasiya batok sa ilegal nga drugas. Si Oaminal nasulod sa DDB ilawom pagdumala kaniadto ni kanhi senador Vicente Sotto. Si Oaminal maoy usa sa nangusog sa panawagan ngadto sa Malacañang nga mopagawas og kamandoan ngadto sa Department of Justice nga rebisahon ang sirkular niini may kalambigitan sa mga kaso sa ilegal nga drugas.

Niadtong Marso 8, misuwat si Oaminal kang Arroyo pagdayeg sa Administrative Order No. 53 nga gititulohan og “Automatic Review of the decisions and resolutions of the Secretary of Justice involving dismissal of cases under Republic Act 9165.”

Apan sumala pa niini, ang mga defense counsels ug mga piskal nakakita gihapon og pamaagi paglikay sa Executive Order ug DOJ Circular No. 46 (Automatic Review of Drug Cases) pinaagi sa pagtuyok-tuyok sa proseso.

Kini sama sa pagkombinser sa mga abogado sa ilang mga kliyenteng suspek nga dili mopirma sa waiver of detention alang sa pagpahigayon og Preliminary Investigation, ug mosugot nalang nga mapasaka ang filing sa kaso diretso sa korte bisan walay inquest ug preliminary investigation.

Matud pa, nga ang gipamuhat karon sa depensa mao ang pag-awhag sa korte nga mopahigayon og reinvestigation ug ang mga piskal mo-rekomendar nalang dayon nga i-dismiss ang kaso.

Gikatahong mahimo kini sanglit ang sakop lamang sa DOJ Circular No. 46 mao ang mga kasong gi-dismiss sa city ug provincial prosecutors atol sa inquest o ba kaha preliminary investigation ug ingon man kadtong may appeal apan dili sa reinvestigation nga gimando sa korte.

Si Oaminal makaduha na ka higayong misuwat ngadto sa DOJ pinaagi nila ni kanhi secretaries Raul Gonzales ug Agnes Devanadera kabahin niining sistemaha apan walay aksyong gibuhat niini. Matud pang Oaminal ang katapusang iyang giduol mao na si Arroyo.

Dako ang pagtuo ni Oaminal nga kinahanglang hatagan kini og pagtagad.

Usa sa gitumbok nga hinungdan sa pagka-dismiss sa mga kaso mao ang wala pagsunod sa law enforcement agencies sa Section 21 sa RA 9165 nga nagmandong kinahanglang dunay physical inventory ug pagkuha og litrato sa mga ebidensya ug pirmahan sa representante sa korte, media ug lokal nga opisyales ang tanang anti-drug operations.

Dinhi lang sa Central Visayas, sa 1,288 ka mga kaso 169 niini ang na-acquit, apan 346 cases ang na-dismiss. Matud pa ni Oaminal, walay problema sa mga acquittal tungod kay klaro kining gihusay sa Korte apan ang dismissal sa mga kaso wala gani kini makasugod sa husay diha sa Korte. Si Oaminal nagkanayon nga daghan pang angayang buhaton ang gobiyerno aron molampos sa kampanya batok sa ilegal nga drugas lakip na niini ang nagkadaiyang mga Alternative Development Programs.

Kini nasugdan na diha sa Balamban, Danao, Toledo, Dalaguete, Alcoy ug Badian sa pagtabang ni kanhi Sotto alang sa mga mag-uuma aron dili na sila matintal pagpananom og marijuana ug uban pa sama sa rehabilitation facilities sa drug dependents.

Karong wala na sa DDB si Oaminal, kini mibutyag nga mopokus siya sa kampanya ni Sotto alang sa May 2010 elections tungod kay ang naulahi maoy usa sa nangusog sa pagpalig-on sa kampanya batok ilegal nga drugas.  – BANAT NEWS