CEBU, Philippines - Pulos kritikal ang kahimtang sa duha ka mga mag-uuma human sila panigbasa sa usa nila ka kauban sa inom didto sa bukirang barangay Tabon, lungsod sa Dalaguete niadtong Biyernes sa gabii.
Ang mga biktima mao si Bejer Heredia, 54, minyo, ug ang ginganlan lang og Cayetano, 46, minyo usab ug pulos molupyo sa Tabon.
Samtang ang suspek mao si Baring Cataay, hingkod nga silingan ra usab sa mga biktima.
Si PO2 Godofredo Glipa sa Dalaguete Police Station mibutyag sa Banat News nga sa wala pa ang pagpanigbas, nag-inom ang tulo ka managsilingan sa usa ka tindahan sa Tabon.
Apan dihang nangalasbag na, miulbo ang ilang panaglalis, ug ang suspetsado nga gibati na og hilabihang kapungot, milanit sa iyang sundang ug walay kukaluoy nga gipanghabas og tigbas ang duha niya ka kauban.
Ang mga biktima nga pulos nakaangkon og samad tinigbasan sa nagkalain laing bahin sa kalawasan daling gihatod ngadto sa Vicente Sotto Memorial Medical Center (VSMMC) sa dakbayan sa Sugbo .
Samtang padayon pang gipangita sa kapolisan ang suspetsado kinsa nagtago -tago human sa maong hitabo. (BANATNEWS)