Nag-away napantok namatay

CEBU, Philippines - Patay ang usa ka stone craft worker human mapantok ang ulo sa usa ka bato atol sa ilang panag-away sa iyang kauban sa trabaho sa Aviation Road sa barangay Basak dakbayan sa Lapulapu sa milabay’ng gabii.

 Ang biktima mao si Violito Lechedo, 39, residente sa maong dapit samtang ang gikaaway niini mao si Artemio Enario, 47, silingan ug kauban sa trabaho sa biktima.

 Base sa imbestigasyon ni SPO2 Federick Eslit sa Crime Against Persons desk, nasutang gikan sa trabaho ang duha ug sa dihang mipauli na sa milabay’ng gabii nag-inom ang duha sa usa ka tindahan sa maong dapit.

 Atol sa ilang panag-inom mitumaw ang panaglalis sa duha ug sa pagpauli ni Lechedo gisundan kini ni Enario aron unta makighusay, apan gikatahong nag-away hinuon ang duha ug gitukmod ni Lechedo si Enario.

 Si Enario nga nakainom na usab ug misuway pagsukol giulang dayon sila sa mga silingang nakakita, apan sa tantong lighot ni Lechedo nahagba kini ug didto napantok ang ulo sa usa ka bato sa maong dapit.

 Gidali og dala sa asawa ug anak si Lechedo ngadto sa Lapulapu City Hospital apan mga 45 minutos nakabsan gyud kini sa kinabuhi sa maong tambalanan.

 Samtang si Enario gisikop sa kapolisan ug kasamtangang gibilanggo sa detention cell sa kapolisan.

 Matud pa ni Eslit kasong homicide ang ilang ipasaka batok ni Enario gumikan kay siya ang hinungdan sa kamatayon ni Lechedo. (Bong Soriano)   (BANATNEWS)