Trabahador gipusil sa mga batang basurero

CEBU, Philippines - Nakapusil og usa ka construction worker ang usa sa siyam ka mga minor de edad nga mamasurahay sa Tumulak St. sa barangay Gun-ob dakbayan sa Lapulapu sa milabay’ng udto.

 Ang biktima mao si Celestino Pungtod Melgar, 42, taga barangay Pundol lungsod sa Balamban, usa ka construction worker sa JJ&J Construction.

 Samtang siyam ka mga mamasurahay nga mga minor de edad nga lalaki ang gitumbok nga maoy responsable sa pagpamusil nga nagpangidaron og 16-anyos samtang ang uban 12 ngadto sa 10-anyos.

 Sa imbestigasyon ni SPO2 Federick Eslit sa Crime Against Persons desk sa kapolisan nasayran nga ang biktima nagtrabaho sa usa ka drainage project nga iya sa kagamhanang local sa dakbayan sa Lapulapu sa maong dapit.

 Mga 12:10 sa milabay’ng udto samtang mipahulay ug naniudto sila si Melgar ug mga kauban kalit miabot ang maong mga gikatahapan ug nanguha sa mga pinutol nga kabilya ug mga kagamitan sa mason.

Dihang ilang gisitar, usa sa mga bata nga gibanabanang nagpangidaron og 16-anyos kalit nga mibunot og gituuhang kalibre .38 rebolber dayong tion kanila.

Apan sa tantong tion kalit kining mibuto ug naigo ang baba sa biktima ug milahos ang bala ngadto sa abaga niini.

Gidali og dala si Melgar sa Lapulapu City Hospital ug gibalhin kini ngadto sa Mactan Doctors Hospital ug padayong giobserbahan sa mga mananambal.

Samtang human sa maong hitabo naglumba og panagan ang mga batang mamasurahay ug napakyas ang kapolisan sa pag-ila kanila. (Bong Soriano)   (BANATNEWS)