Task Force batok gangs subling buhion sa CCPO tungod mga krimen

CEBU, Philippines - Buhi-on og balik sa kapolisan sa syudad sa Sugbo Anti-Street Hoodlum Operation Team (A-SHOT) nga maoy motutok sa mga krimeng gikalambigitan sa mga street gangs.

Matud pa ni Cebu City Police Director Patrocinio Comendador nga ang A-SHOT pangulohan unya ni Sr. Insp. Bonifacio Garciano aron paglusad og paggukod sa tanang gang members nga dunay mga warrants of arrests ug kadtong gidudahang dunay mga gihipusang mga armas.

Kahinumduman nga ning mga nanglabay’ng mga adlaw nalambigit na usab og sunod-sunod nga mga krimen ang mga sakop sa Bloods ug Crips gangs.

Ang A-Shot maoy hinungdan sa pagkasikop sa mga gang members nga nalambigit sa pagtulis ug pagpatay sa tinun-ang si Ruby Jade Ruba duha ka tuig na ang nakalabay.

“They will conduct search warrant and stake out leaders and effect arrest to them,” pasabot pa ni Comendador, dugang sa panawagan sa mga opisyales sa gobiyernong kansang mga anak lider sa mga gangs nga disiplinahon sila sanglit walay ilhon ang A-SHOT sa operasyon niini.

Ang mga gang members sagad anha makit-an sa Pardo, Carreta, Tejero, Guadalupe, Labangon, Panganiban Area ug Kalubihan. (Lesley Caminade)   (BANATNEWS)