Higala sa killer sa maestro gitipi

CEBU, Philippines - Usa ka mamuhatay og sapatos gipaulanan og bala sa duha ka wala mailhing lalaking nagtaptap sa ilang mga nawong nga nagmotor pasado alas otso sa buntag kagahapon sa sitio Baha-baha, Liboron syudad sa Carcar.

Si Regie Villasquina, 29, molupyo sa maong lugar nakaangkon og samad pinusilan sa nagkadaiyang parte sa lawas nga nakaingon sa hinanali niining kamatayon.

Base sa inisyal nga imbestigasyon sa kapolisan nasayran nga ang biktima nagkawos og tubig sa usa ka atabay pipila ka metros ang gilay-on gikan sa ilang panimalay dihang kalit giduol sa duha ka tawong nagmotor ug gipusil.

Ang mga silingan nga nakadungog sa buto daling misusi sa lugar ug ilang nakit-an ang biktima nga nagbuy-od ug naglunang sa kaugalingong dugo hinungdan nga ilaha kining gidala sa Carcar District Hospital apan nakabsan kini sa kinabuhi pag-abot sa tambalanan.

Sa pakighinabi sa Banat News ni PO2 Alex Buanghog sa Carcar Police Station, kini mibutyag nga adunay nakakita sa panghitabo nga posibleng nakaila sa mga mamumuno bisan pa sila og nagtaptap.

Dugang pa ni Buanghog nga walay plate number ang maong motor, apan nagduda si Buanghog nga adunay kalambigitan ang pagkamatay niini sa nahitabong pagpatay kang Arcelli Cabungcal.

Si Cabungcal ug ang biktima gikatahong maoy kanunay’ng makit-ang magkuyog.

Si Cabungcal igsuon ni Arnel Cabungcal nga maoy gitumbok nga suspetsado pagpusil patay sa magtutudlong si Romeo Duran nga maestro sa Binlod Elementary School lungsod sa Argao niadtong milabay’ng buwan.

Nakuha sa crime scene ang tulo ka kabhang sa kalibre .45 nga gidudahang maoy gigamit sa pagpamusil.

Nagduda karon ang kapolisan nga posibleng gihinay-hinay na og hipos ang mga gitumbok nga suspek sa pagpamusil sa maong maestro aron malisdan na ang mga imbestigador sa pagtumbok sa mastermind sa krimen. (BANATNEWS)